28 жніўня музыкай і звонкімі галасамі песень паклікаў усіх палешукоў ў Ляскавічы міжнародны фестываль этнакультурных традыцый "Кліч Палесся". Фестывалю гэтага года папярэднічала маштабная рэканструкцыя, праведзеная ў Ляскавічах — на набярэжнай ўзвялі цэлую вёску і мноства цікавых аб’ектаў, якія захаваюцца і пасля фестывалю, абсталявалі выдатную гульнявую пляцоўку для дзяцей.
Фестывальныя пляцоўкі ператварыліся ў своеасаблівы гісторыка-этнаграфічны музей пад адкрытым небам. Узведзены цэлы шэраг новых аб’ектаў гісторыка-этнаграфічнага комплексу “Музей пад адкрытым небам”. Супрацоўнікі музея "Бездзежскі фартушок" таксама прынялі ўдзел у гэтым цудоўным фестывалі з выставай вытканых і вышытых фартушкоў. Госці свята мелі магчымасць наведаць млын, кузню, майстэрні ганчара, саломапляцення, ткацтва, лозапляцення, бондарства, дамы рыбака і паляўнічага, кафэ ў стылі народных традыцый. На выставах-кірмашах рамеснікаў можна было не толькі набыць тавар, які спадабаўся, але і навучыцца яго вырабляць. А станоўчыя эмоцыі і прыемныя сустрэчы былі атрыбутам гэтага свята.